Feijóo anuncia que Goberno retirará recurso contra catálogo de medicamentos

O presidente da Xunta, Alberto Núñez Feijóo, anunciou hoxe que o Ministerio de Sanidade lle comunicou que prevé retirar o recurso que interpuxo o anterior goberno socialista contra o catálogo galego de medicamentos pois non hai 'ningunha razón económica nin sanitaria' para mantelo.

Na súa intervención inicial do debate de política xeral no Parlamento autonómico, o último da lexislatura, Feijóo tamén informou de que neste mesmo xoves se reunirá co presidente do Executivo central, Mariano Rajoy, para 'continuar avanzando nas prioridades de Galicia'.

Estas son, agora, 'tamén as prioridades do Goberno de España', continuou, polo que confiou en que neste encontro 'poidan ser abordadas como tal'.

Despois de se referir ao 'desbloqueo' da paralización do autogoberno por parte do Ministerio do Interior, que xa comunicou oficialmente que reforzará a Policía Autonómica con 157 novos axentes, Feijóo afirmou que 'urxe abrir unha nova etapa na relación entre o Goberno central e as autonomías'.

'Unha nova etapa en que se pase da tensión sistemática á cooperación ordinaria', indicou, e engadiu que a Xunta ten disposición completa para retomar e avanzar nunha 'España cooperativa', algo que non xorde polo cambio de Goberno, senón que é exactamente 'a mesma oferta' que fixo no anterior debate, manifestou.