A Xunta traballa con programas de apoio familiar co fillo e neto da muller que morreu en Lugo por falta de atención
Os tres familiares arrestados quedaron en liberdade provisional imputados por un suposto delito contra as relacións familiares
A Consellería de Traballo e Benestar traballa con programas de apoio co menor de 14 anos e o bebé, fillo e neto, respectivamente, da muller que faleceu en Lugo por non recibir a atención debida, feito que motivou a detención de tres familiares que convivían con ela.
Segundo informaron fontes do departamento de Traballo e Benestar a Europa Press, dende que a xuíza se puxo en contacto coa Xunta o pasado día 2, técnicos do departamento de Menores avaliaron a situación do mozo de 14 anos e do bebé.
Se ben a tutela dos menores a exercen familiares da vítima por orde da xuíza que leva a causa, a Xunta iniciou un plan de actuación concreto co mozo de 14 anos, que acudirá de luns a venres a un centro de día para traballar con el en materia de apoio familiar e ver a súa evolución.
En canto ao bebé, a Xunta dispuxo un plan de apoio e seguimento coa familia coa que reside, a través do Equipo de Integración Familiar, xa que está a cargo do seu avó. Deste modo, as mesmas fontes destacaron que se pretende velar polo benestar de ambos os dous menores.
Pola súa banda, o Concello de Lugo destacou que esta familia non solicitara ao departamento municipal de Servizos Sociais axuda para a muller falecida, que padecía a enfermidade de Alzheimer, xa que 'nunca' se puxo en contacto coa Casa do concello.
Non obstante, fontes municipais sinalaron que a familia pediu axuda a un centro de saúde de Lugo dependente do Sergas e a un centro de día privado.
FEITOS
Os tres familiares da vítima foron detidos acusados dun delito de homicidio por deixar morrer a un familiar que non se podía mover e ao que non prestaron a atención debida, o que lle produciu unha desnutrición e acelerou a súa morte, segundo a Comisaría de Lugo.
Os tres detidos eran familiares directos da muller falecida e convivían no mesmo domicilio no que se produciu a morte. Así mesmo, nesta vivenda tamén residía o menor de 14 anos de idade -fillo da falecida- e un bebé de sete meses -o seu neto-.
O pasado 2 de febreiro procedeuse ao levantamento do cadáver desta muller, que atopaba nun cuarto do seu domicilio habitual, en condicións de insalubridade e abandono, xa que presentaba grande cantidade de feridas e chagas.
Ante as evidencias de que a muller non recibira os coidados máis elementais, foi aberta unha investigación que permitiu comprobar que tampouco se lle prestara asistencia médica e que, nas últimas semanas, non recibira alimento, nin foi aseada, nin levantada da cama. Desta forma, sufriu unha desnutrición, o que provocou 'unha aceleración do proceso que lle produce a morte', segundo a Policía.
EN LIBERDADE
Os tres detidos en relación estes feitos quedaron en liberdade provisional e sen medidas preventivas tras prestar declaración o xoves no Xulgado de Instrución Número 2 de Lugo.
A estas tres persoas impútaselles un suposto delito contra as relacións familiares, segundo confirmaron fontes xudiciais.
Contenido patrocinado
También te puede interesar
Lo último
Una noti en gallego (5)
Una noti en gallego (5)
Una noti en gallego (4) sin categoría
Una noti en gallego (4) sin categoría
Una noti en gallego (3) sin tag
Una noti en gallego (3) sin tag
Una noti en gallego (2)
Una noti en gallego (2)